पालवी नर्चरिंग माईंड्स अँड बियॉन्डच्या निधी उभारणी कार्यक्रमाला पुणेकरांची उत्स्फूर्त दाद
पुणे | प्रतिनिधी : दि. 6 फेब्रुवारी 2026 एप्रिल 2025 मध्ये स्थापन झालेल्या पालवी नर्चरिंग माईंड्स अँड बियॉन्ड या सामाजिक संस्थेच्या कार्यासाठी निधी उभारण्याच्या उद्देशाने एक अविस्मरणीय सांस्कृतिक कार्यक्रम पुण्यात पार पडला. अतुल मिश्रा व त्यांच्या सहकाऱ्यांनी सुप्रसिद्ध सिनेकलावंत धर्मेंद्र यांच्या चित्रपटातील अजरामर गीतांवर आधारित “पल पल दिलके पास” हा संगीतमय कार्यक्रम विनामूल्य सादर करून समाजकार्याला मोलाची साथ दिली.
हा कार्यक्रम पुणे इंटरनॅशनल सेंटर, पाषाण येथील
सभागृहात आयोजित करण्यात आला होता. कार्यक्रमास हजारो रसिकांची उपस्थिती लाभली असून, उपस्थित प्रेक्षकांनी कलाकारांच्या सादरीकरणाला उत्स्फूर्त टाळ्यांच्या गजरात दाद दिली. संपूर्ण सभागृह संगीतमय वातावरणाने भारावून गेले होते.
या कार्यक्रमाचे मुख्य अतिथी म्हणून आयसर संस्थेचे संचालक सुनील भागवत उपस्थित होते. त्यांनी संस्थेच्या सामाजिक कार्याचे कौतुक करत अशा उपक्रमांची समाजाला नितांत गरज असल्याचे प्रतिपादन केले. तसेच जितेंद्र दिवगी यांनी बिट्स पिलानी संस्थेच्या माजी विद्यार्थी संघटनेच्या वतीने संस्थेस आर्थिक सहाय्य प्रदान करून सामाजिक बांधिलकी जपली.
पालवी नर्चरिंग माईंड्स अँड बियॉन्ड या संस्थेच्या संस्थापक शोभा श्रीकांत, वर्षा काळे, सुधा भट आणि निपा जोग यांनी या कार्यक्रमाच्या यशस्वी आयोजनासाठी विशेष मेहनत घेतली. नियोजनापासून अंमलबजावणीपर्यंत प्रत्येक टप्प्यावर त्यांनी घेतलेली धडपड उल्लेखनीय ठरली.
या कार्यक्रमाच्या निमित्ताने अनेक दानशूर नागरिकांनी संस्थेला उदार हस्ते आर्थिक मदत केली. या माध्यमातून उभारण्यात आलेल्या निधीचा उपयोग संस्थेतर्फे विविध समाजोपयोगी, शैक्षणिक व संवेदनशील उपक्रमांसाठी करण्यात येणार असल्याची माहिती आयोजकांनी दिली.
संगीत, समाजकार्य आणि माणुसकी यांचा सुंदर संगम असलेला हा कार्यक्रम उपस्थितांच्या मनात दीर्घकाळ स्मरणात राहणारा ठरला.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
