बोपोडी | प्रतिनिधी: दि. 5 मे 2026आजच्या धावपळीच्या आणि तणावपूर्ण जीवनात काम, क्रोध आणि विविध विकारांच्या प्रभावामुळे मानव अस्वस्थ होत चालला आहे. युद्धजन्य परिस्थितीमुळे जग तिसऱ्या महायुद्धाच्या उंबरठ्यावर उभे असल्याची भीती व्यक्त केली जात असताना, समाजात शांतता, सकारात्मकता आणि मूल्याधिष्ठित जीवनाचा संदेश देण्यासाठी ब्रह्माकुमारीजसारख्या आध्यात्मिक संस्था महत्त्वपूर्ण कार्य करत आहेत. याच पार्श्वभूमीवर पुण्यातील बोपोडी येथे ब्रह्माकुमारीजच्या वतीने 400 हून अधिक कुमारांसाठी विशेष दोन दिवसीय ध्यान-साधना शिबिराचे आयोजन करण्यात आले.
या शिबिराचा मुख्य उद्देश युवकांच्या जीवनात सकारात्मक परिवर्तन घडवून आणणे तसेच जगभर शांततेचे स्पंदन पसरवणे हा होता. शिबिराची सुरुवात पारंपरिक दीपप्रज्वलनाने करण्यात आली. ज्ञान, आशा आणि आध्यात्मिक प्रकाशाचे प्रतीक मानल्या जाणाऱ्या दीपप्रज्वलनानंतर आबूराज ग्लोबल हॉस्पिटलचे वरिष्ठ वैद्यकीय तज्ज्ञ डॉ. सचिन यांनी उपस्थितांना मार्गदर्शन केले.
कार्यक्रमास पुण्यातील शांतिकुंज सेवा केंद्राच्या संचालिका राजयोगिनी उर्मिला दीदी, मीरा सोसायटी सेवा केंद्राच्या संचालिका सुनंदा दीदी, राजयोगिनी नलिनी दीदी, ब्र.कु. दशरथ भाई, ब्र.कु. मुकुल भाई, ब्र.कु. सुनील भाई तसेच पुणे जिल्हा मीडिया समन्वयक बी.के. सोमनाथ म्हस्के यांच्यासह अनेक मान्यवर उपस्थित होते. सर्व मान्यवरांनी आपल्या प्रेरणादायी विचारांद्वारे उपस्थित कुमारांना आत्मोन्नती, शिस्त आणि विश्वसेवेच्या मार्गावर चालण्याची प्रेरणा दिली.
यावेळी मार्गदर्शन करताना डॉ. सचिन म्हणाले, “खरा बदल स्वतःपासूनच सुरू होतो. जेव्हा व्यक्ती आपल्या विचार, वाणी आणि कृतीत शुद्धता आणते, तेव्हाच ती इतरांसाठी प्रेरणास्थान बनते. आत्मपरिवर्तन हाच विश्वपरिवर्तनाचा पाया आहे.” आध्यात्मिकदृष्ट्या सक्षम झालेला व्यक्तीच समाजाला योग्य दिशा देऊ शकतो, असेही त्यांनी स्पष्ट केले.
देशाच्या विविध भागांतून आलेल्या कुमारांनी या शिबिरात उत्साहाने सहभाग घेतला. अनेक युवकांनी आपल्या पूर्वीच्या व्यसनांपासून व नकारात्मक सवयींपासून दूर राहून अनेक वर्षांपासून शुद्ध, संयमी आणि सुसंस्कारित जीवन स्वीकारले असल्याचे यावेळी सांगण्यात आले. हे युवक आता सामाजिक कार्य, चारित्र्यनिर्मिती आणि नैतिक मूल्यांच्या जपणुकीसाठी कार्यरत असून इतरांनाही या श्रेष्ठ मार्गावर चालण्याची प्रेरणा देत आहेत.
या शिबिराचे यशस्वी आयोजन ब्रह्माकुमारीज बोपोडीच्या लक्ष्मी दीदी यांच्या नेतृत्वाखाली करण्यात आले. यामध्ये ब्रह्माकुमारी उषा दीदी आणि ब्र.कु. दयानंद भाई यांचे विशेष सहकार्य लाभले. संपूर्ण कार्यक्रमात शिस्त, सकारात्मक ऊर्जा आणि आध्यात्मिक वातावरण यांचा प्रभाव स्पष्टपणे जाणवत होता.
हे दोन दिवसीय शिबिर युवकांच्या जीवनात सकारात्मक बदल घडवणारे ठरले असून समाजात शांतता, सौहार्द आणि नैतिक मूल्यांची रुजवण करण्याच्या दृष्टीने एक महत्त्वपूर्ण पाऊल मानले जात आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
