पुणे | प्रतिनिधी : दि. 18 मे 2026 नुकत्याच राज्यसभेच्या खासदारपदी निवड झालेल्या ज्योती वाघमारे यांचा हिंदू मोची पुणे शहर समाजाच्या वतीने भव्य सत्कार सोहळा उत्साहात संपन्न झाला. हा मेळावा येरवडा येथील लोकशाहीर अण्णाभाऊ साठे सभागृह येथे पार पडला.
कार्यक्रमाचे उदघाटन उच्च व तंत्रज्ञान शिक्षण मंत्री चंद्रकांत पाटील यांच्या हस्ते दीप प्रज्वलन व राष्ट्रपुरुषांच्या प्रतिमेस पुष्पहार अर्पण करून करण्यात आले. यावेळी बोलताना चंद्रकांत पाटील यांनी समाजाला सर्वतोपरी सहकार्य करण्याचे आश्वासन दिले.
सत्काराला उत्तर देताना खासदार ज्योती वाघमारे यांनी सर्वसामान्य कुटुंबातून राज्यसभेपर्यंतच्या आपल्या प्रवासाचा उलगडा केला. “गाईच्या दुधाला किंमत असते, म्हशीच्या दुधाला किंमत असते; मात्र आईच्या दुधाला किंमत नसते,” अशी भावनिक उपमा देत त्यांनी समाजाच्या प्रेमाबद्दल कृतज्ञता व्यक्त केली. त्यांच्या प्रभावी भाषणाने उपस्थितांची मने जिंकली.
या मेळाव्याच्या निमित्ताने समाजातर्फे आयोजित करण्यात आलेल्या आठवडाभराच्या क्रीडा महोत्सवातील विजेत्या संघांना पारितोषिक वितरण करण्यात आले तसेच सहभागी खेळाडूंचा सत्कार करण्यात आला. यासोबतच वधू-वर परिचय मेळावा आणि महिलांसाठी आयोजित “होम मिनिस्टर” कार्यक्रमालाही उत्स्फूर्त प्रतिसाद मिळाला.
यावेळी सोलापूरचे नवनिर्वाचित नगरसेवक नर्सिंग असादे यांचाही सत्कार करण्यात आला. कार्यक्रमास पुणे महापालिका नगरसेविका शितल सावंत, मृणाली कांबळे, खडकी छावणी परिषदेचे नामनिर्देशित सदस्य अभय सावंत तसेच माजी सदस्य कमलेश चासकर उपस्थित होते.
कार्यक्रमाचे स्वागत हिंदू मोची समाजाचे पुणे शहर अध्यक्ष शिरीष रोच यांनी केले तर सूत्रसंचालन सेक्रेटरी विकास गडपल्लू यांनी केले.
कार्यक्रम यशस्वी करण्यासाठी किशोर धडेलु, किशोर गोरेल, शरद रोच, श्रीनिवास गोरेल, तानाजी पलेलू, विनोद पिंजरेलू, मयूर संगेवार, जयराज लिंगवत, कैलास गोरेल, महेश बटेल्लू, अरविंद इंद्रोल, संजय इदारू, विनोद बागेल्लू, निलेश भोसले आणि पौर्णिमा भोसले यांनी विशेष परिश्रम घेतले.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
