बोपोडी | प्रतिनिधी : दि. १५ फेब्रुवारी २०२६
शहरातील घनकचरा विभागाच्या ढिसाळ आणि आंधळ्या कारभारावर उपमहापौर परशुराम वाडेकर यांनी थेट आक्रमक भूमिका घेतली आहे. स्वच्छतागृह आणि कचरा व्यवस्थापनाची नियमित स्वच्छता झाली नाही तर “मी स्वतः झाडू हाती घेईन” असा थेट इशारा त्यांनी संबंधित अधिकाऱ्यांना दिला.
पदभार स्वीकारल्यानंतर वाडेकर यांनी पहाटे ६ वाजता अचानक धडक तपासणी केली. या वेळी घनकचरा विभाग प्रमुख अविनाश सपकाळ, क्षेत्रीय आयुक्त नायकर, मुख्य आरोग्य निरीक्षक इनामदार, आरोग्य निरीक्षक विनायक चोपडे, प्रवीण दरेकर, मुकादम संतोष शेलार आणि सिद्धार्थ बागुल यांच्यासह दोन ते तीन आरोग्य कोठ्यांची पाहणी करण्यात आली.
■ धक्कादायक वास्तव उघड
तपासणीदरम्यान खुद्द आरोग्य निरीक्षक अनुपस्थित असल्याचे आढळले. ५४ सफाई कर्मचाऱ्यांपैकी फक्त २३ कर्मचारी हजर होते. मात्र कागदोपत्री १०० टक्के उपस्थिती दाखवण्यात आल्याचा प्रकार समोर आला.
या प्रकारामुळे विभागात अधिकाऱ्यांमध्ये संगनमत असल्याचा संशय व्यक्त करण्यात आला आहे. एकमेकांच्या चुकांवर पांघरूण घालण्याचा प्रकार सुरू असल्याचे स्पष्ट दिसून आले.
■ दंडात्मक कारवाईला सुरुवात
उशिरा आलेल्या कर्मचाऱ्यांवर तात्काळ दंडात्मक कारवाई करण्यात आली असून उर्वरित अनुपस्थित कर्मचाऱ्यांवरही कठोर कारवाई होणार असल्याचे वाडेकर यांनी स्पष्ट केले.
“नागरिकांचे आरोग्य धोक्यात”
शहरातील विशेषतः झोपडपट्टी भागातील नागरिकांना अस्वच्छतेमुळे नरकयातना सहन कराव्या लागत आहेत. सार्वजनिक शौचालयांची अवस्था अत्यंत बिकट असून कचरा पेट्या वेळेवर रिकाम्या केल्या जात नाहीत. यामुळे संसर्गजन्य आजारांचा धोका वाढला आहे.
घनकचरा विभाग प्रमुख सपकाळ यांच्या उपस्थितीतच वस्तुस्थिती उघड झाल्याने आता कामचुकार कर्मचाऱ्यांवर कारवाईची प्रक्रिया सुरू झाली आहे. विभागाच्या कारभारात तातडीने सुधारणा करण्याचे कडक आदेश देण्यात आले आहेत.
जनतेच्या आरोग्याशी तडजोड खपवून घेतली जाणार नाही असा स्पष्ट इशारा उपमहापौरांनी दिला आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
