“मुख्य आरोपींना अटक होईपर्यंत आंदोलन सुरूच राहणार” — श्रीकांत पाटील
पुणे | प्रतिनिधी : दि. 13 मे 2026
नीट परीक्षा पेपरफुटी प्रकरणामुळे लाखो विद्यार्थ्यांचे मोठे नुकसान झाल्याचा आरोप करत राष्ट्रवादी विद्यार्थी काँग्रेस शरदचंद्र पवार पक्षाच्या वतीने पुण्यात आंदोलन करण्यात आले. पुणे शहरातील बालगंधर्व रंगमंदिर चौकात झालेल्या या आंदोलनात केंद्र सरकारविरोधात जोरदार घोषणाबाजी करण्यात आली.
या आंदोलनाचे नेतृत्व राष्ट्रवादी विद्यार्थी काँग्रेस शरदचंद्र पवार पक्षाचे प्रदेशाध्यक्ष सुनील गव्हाणे तसेच पुणे शहराध्यक्ष श्रीकांत पाटील यांनी केले. नीट पेपरफुटी प्रकरणात पोलिसांनी दोघांना अटक केली असली तरी या घटनेमुळे देशभरातील लाखो विद्यार्थ्यांचे शैक्षणिक नुकसान झाले असून विद्यार्थी वर्गातून तीव्र संताप व्यक्त केला जात आहे.
यावेळी बोलताना प्रदेशाध्यक्ष सुनील गव्हाणे म्हणाले की, “मागील १२ वर्षांपासून केंद्र आणि राज्य सरकार विद्यार्थी वर्गाच्या हिताचे ठोस निर्णय घेण्यात अपयशी ठरले आहे. नीटसारख्या महत्त्वाच्या परीक्षेचा पेपर फुटणे ही अत्यंत गंभीर बाब असून यामुळे लाखो विद्यार्थ्यांच्या भविष्याशी खेळ झाला आहे. या प्रकरणाला सरकार जबाबदार असून मुख्य आरोपींना तातडीने अटक करून कठोर कारवाई करावी.”
पुणे शहराध्यक्ष श्रीकांत पाटील म्हणाले, “केंद्र सरकारच्या ढिसाळ नियोजनामुळे विद्यार्थ्यांचे मोठे नुकसान झाले आहे. जोपर्यंत या प्रकरणातील मुख्य आरोपींना अटक होत नाही, तोपर्यंत आमचे आंदोलन सुरूच राहील. भविष्यात नीटसह इतर कोणत्याही परीक्षांचे पेपर लिक होणार नाहीत यासाठी सरकारने विशेष उपाययोजना कराव्यात.”
या आंदोलनात विद्यार्थी कार्यकर्ते मोठ्या संख्येने सहभागी झाले होते. विद्यार्थ्यांच्या न्यायासाठी लढा सुरूच ठेवण्याचा निर्धार आंदोलनकर्त्यांनी व्यक्त केला.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
