ज्येष्ठ साहित्यिक व कलाकारांना आर्थिक आधार; ‘राजर्षी शाहू महाराज मानधन सन्मान’ योजनेसाठी अर्ज सुरू
पुणे, दि. ३० : साहित्य, कला आणि संस्कृती क्षेत्रात दीर्घकाळ योगदान देणाऱ्या ज्येष्ठ साहित्यिक व कलाकारांना आर्थिक आधार देण्याच्या उद्देशाने राबविण्यात येणाऱ्या ‘राजर्षी शाहू महाराज ज्येष्ठ साहित्यिक व कलाकार मानधन सन्मान’ योजनेसाठी १ जुलै ते ३१ जुलै २०२६ या कालावधीत ऑनलाइन अर्ज मागविण्यात आले आहेत. पात्र लाभार्थ्यांना या योजनेअंतर्गत दरमहा रु. ५,००० इतके मानधन प्रदान करण्यात येणार आहे.
या योजनेचा लाभ घेण्यासाठी अर्जदाराचे वय ५० वर्षांपेक्षा अधिक असणे आवश्यक असून दिव्यांग कलाकारांसाठी वयोमर्यादा ४० वर्षे ठेवण्यात आली आहे. तसेच कला किंवा साहित्य क्षेत्रात किमान १५ वर्षांचे उल्लेखनीय योगदान, वार्षिक उत्पन्न रु. ६० हजारांपेक्षा कमी आणि अर्जदार हा महाराष्ट्राचा रहिवासी असणे बंधनकारक आहे.
योजनेत विधवा, परित्यक्ता, दिव्यांग तसेच वयोवृद्ध साहित्यिक व कलाकारांना प्राधान्य देण्यात येणार असून त्यांच्या कार्याचा सन्मान करण्यासोबतच आर्थिक पाठबळ देण्याचा शासनाचा प्रयत्न आहे.
इच्छुक व पात्र साहित्यिक आणि कलाकारांनी महाराष्ट्र शासनाच्या ‘आपले सरकार’ पोर्टलवर ३१ जुलै २०२६ पर्यंत ऑनलाइन अर्ज सादर करावेत. अर्जासोबत वयाचा पुरावा, आधार कार्ड, उत्पन्नाचा दाखला, रहिवासी दाखला, बँक पासबुक तसेच आवश्यक कागदपत्रे अपलोड करणे अनिवार्य आहे.
योजनेबाबत अधिक माहितीसाठी संबंधित कार्यालयाशी संपर्क साधावा. जास्तीत जास्त पात्र साहित्यिक व कलाकारांनी या योजनेचा लाभ घ्यावा, असे आवाहन सदस्य सचिव तथा उपमुख्य कार्यकारी अधिकारी (पंचायत) भूषण जोशी यांनी केले आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
