फुटलेल्या गटारी, तुंबलेले ड्रेनेज आणि उघड्या कचराकुंडीमुळे आरोग्याचा प्रश्न ऐरणीवर.
खडकी | प्रतिनिधी : दि. 3 जुलै 2026
खडकी बाजार येथील पीएमपीएमएल बस स्थानकासमोरील परिसराची दयनीय अवस्था नागरिकांसाठी डोकेदुखी ठरत आहे. खडकी बाजाराकडे प्रवेश करताना फुटलेले ड्रेनेज, तुटलेल्या गटारी, उघडी कचराकुंडी आणि पावसाच्या पाण्याचा योग्य निचरा नसल्याने परिसरात मोठ्या प्रमाणात घाण व साचलेले पाणी दिसून येत आहे. त्यामुळे या मार्गाने ये-जा करणाऱ्या नागरिकांना मोठ्या गैरसोयीचा सामना करावा लागत आहे.
स्थानिकांच्या म्हणण्यानुसार, पावसाळ्यापूर्वी आवश्यक देखभाल आणि दुरुस्तीची कामे न झाल्यामुळे परिस्थिती अधिकच बिकट झाली आहे. कॅन्टोन्मेंट बोर्डाकडून कचरा उचलला जात असला तरी नागरिकांकडून पुन्हा उघड्यावर कचरा टाकला जात असल्याने परिसरात वर्षभर अस्वच्छता कायम राहते. थोडासा पाऊस पडला तरी या ठिकाणी गटाराचे पाणी रस्त्यावर येत असल्याने पादचाऱ्यांना आणि बसस्थानकाकडे जाणाऱ्या प्रवाशांना अक्षरशः घाणीमधून मार्ग काढावा लागत आहे.
या गंभीर समस्येकडे लक्ष वेधत राष्ट्रवादी युवक काँग्रेसचे खडकी विभाग अध्यक्ष लोकेश मोरे यांनी खडकी कॅन्टोन्मेंट बोर्ड प्रशासनाकडे तातडीने दुरुस्तीची कामे हाती घेण्याची मागणी केली आहे. नागरिकांच्या आरोग्याचा प्रश्न लक्षात घेऊन फुटलेल्या गटारी, ड्रेनेज व्यवस्था आणि परिसराची स्वच्छता यावर त्वरित उपाययोजना कराव्यात, अशी मागणी त्यांनी केली आहे.
आता खडकी कॅन्टोन्मेंट बोर्ड प्रशासन या समस्येची कितपत दखल घेते आणि नागरिकांना या त्रासातून कधी दिलासा मिळतो, याकडे परिसरातील नागरिकांचे लक्ष लागले आहे.
यासंदर्भात अधिक माहिती घेण्याकरिता खडकी कॅन्टोन्मेंट बोर्डाचे आरोग्य निरीक्षक वैभव कदम यांच्याशी भ्रमणध्वनी वरून संपर्क केला असता त्यांनी प्रतिसाद दिला नाही.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
