बोपोडी | प्रतिनिधी : दि. १२ जानेवारी
पुणे महापालिका निवडणुकीच्या रणधुमाळीत जिथे मोठमोठ्या सभा, शक्तिप्रदर्शन, बॅनरबाजी आणि घोषणा सुरू आहेत, तिथे प्रभाग क्रमांक 8 औंध–बोपोडीमध्ये अपक्ष उमेदवार ज्योती नागेश परदेशी यांनी मात्र प्रचाराची वेगळीच दिशा घेतल्याचे स्पष्टपणे दिसून येत आहे. कोणताही गाजावाजा न करता, शांततेत पण ठामपणे त्या घरोघरी जाऊन मतदारांशी थेट संवाद साधत आहेत आणि हाच प्रचार सध्या सर्वाधिक चर्चेचा विषय ठरत आहे.
औंध–बोपोडीतील आंबेडकर चौक, बोपोडी गावठाण, डी.पी. रोड परिसरात ज्योती परदेशी यांचा प्रचार दौरा सातत्याने सुरू आहे. सोसायट्यांमध्ये कोणतेही प्रदर्शन न करता गुप्त बैठकांच्या माध्यमातून नागरिकांचे प्रश्न ऐकून घेणे, प्रभागातील अपूर्ण विकासकामांवर थेट चर्चा करणे आणि पुढील पाच वर्षांचा स्पष्ट आराखडा मांडणे, ही त्यांची प्रचार पद्धत मतदारांना भावताना दिसत आहे.
राजकारणातील ३० वर्षांहून अधिक अनुभव असलेल्या ज्योती परदेशी या केवळ आश्वासनांवर नव्हे तर अनुभव, संपर्क आणि कामाच्या शिस्तीवर मत मागताना दिसत आहेत. प्रभागातील प्रत्येक गल्लीत, प्रत्येक घरात त्या स्वतः उपस्थित राहून मतदारांना विकासाचे मुद्दे पटवून देत असल्याचे चित्र आहे. हीच गोष्ट इतर उमेदवारांपेक्षा त्यांना वेगळी ठरवत असल्याची चर्चा नागरिकांमध्ये आहे.
विशेष म्हणजे, अनेक ठिकाणी महिला मतदारांनी ज्योती परदेशी यांचे औक्षण करत “आम्ही तुमच्या पाठीशी आहोत” असा ठाम संदेश दिला आहे. महिला, ज्येष्ठ नागरिक आणि तरुण वर्गाकडून मिळणारा हा प्रतिसाद सत्ताकेंद्रांना अस्वस्थ करणारा ठरत असल्याचे राजकीय निरीक्षक सांगतात.
प्रभागात सर्वच पक्ष आपली ताकद दाखवण्यात गुंतलेले असताना, ज्योती परदेशी या मात्र शांततेत पण ठोस पायाभूत जनाधार उभा करत असल्याचे दिसून येत आहे. मतांची खरी लढाई मैदानावर नव्हे, तर घराघरांत लढली जाते, हे त्यांच्या प्रचारातून अधोरेखित होत आहे.
ज्योती नागेश परदेशी या अपक्ष उमेदवार असून त्यांचे निवडणूक चिन्ह ‘रोड रोलर’ आहे. बाह्य गाजावाज्याऐवजी जनतेशी थेट संवाद आणि अनुभवाच्या बळावर उभी राहिलेली ही उमेदवारी प्रभाग 8 मधील राजकीय समीकरणे बदलणार का, याकडे आता सर्वांचे लक्ष लागले आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
