महत्त्वाचा मार्ग ठप्प; स्थानिकांना वळसा, रस्ता तात्काळ सुरू करा – राष्ट्रवादीची मागणी
शिवाजीनगर | प्रतिनिधी : २२ एप्रिल २०२६ पाटील इस्टेट परिसरातून संचेती हॉस्पिटलकडे जाणारा महत्त्वाचा रस्ता गेल्या काही दिवसांपासून बंद करण्यात आल्याचे समोर आले आहे. या निर्णयामुळे पाटील इस्टेट तसेच महात्मा गांधी वसाहतीतील नागरिकांना मोठ्या अडचणींचा सामना करावा लागत आहे.
सदर रस्ता हा स्थानिकांसाठी अत्यंत महत्त्वाचा दुवा असून, याच मार्गामुळे या भागातील वस्ती शहराच्या मध्यवर्ती भागाशी जोडली जाते. रस्ता बंद किंवा एकेरी केल्यास नागरिकांना लांबचा वळसा घालून प्रवास करावा लागत असून, त्यामुळे वेळ आणि इंधनाचा अतिरिक्त खर्च होत आहे. तसेच आपत्कालीन परिस्थितीतही अडचणी निर्माण होण्याची शक्यता व्यक्त केली जात आहे.
या पार्श्वभूमीवर राष्ट्रवादी युवक काँग्रेस (शरदचंद्र पवार पक्ष) तर्फे संबंधित प्रशासनाकडे निवेदन देण्यात आले. अॅड. स्वप्निल मारुती जोशी (कार्यकारिणी सदस्य, पुणे बार असोसिएशन व अध्यक्ष, राष्ट्रवादी युवक काँग्रेस – छत्रपती शिवाजीनगर विधानसभा मतदारसंघ) यांनी वाहतूक विभागाचे पोलीस सहाय्यक निरीक्षक श्री. प्रमोद दोरकर यांची भेट घेऊन सविस्तर चर्चा केली.
यावेळी नागरिकांच्या अडचणी लक्षात घेऊन सदर रस्ता तात्काळ पूर्ववत सुरू करण्याची मागणी करण्यात आली. संबंधित अधिकाऱ्यांनीही या विषयाची दखल घेत लवकरात लवकर तोडगा काढण्याचे आश्वासन दिल्याची माहिती देण्यात आली आहे.
स्थानिक नागरिकांनीही प्रशासनाने त्वरित निर्णय घेऊन रस्ता सुरू करावा, अशी अपेक्षा व्यक्त केली आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
