“स्टॉल हटवा, अन्यथा कारवाई”च्या दमाला विक्रेत्यांचा विरोध; कायद्याची अंमलबजावणी न झाल्यास बेमुदत उपोषणाचा इशारा
पिंपळे सौदागर | पुणे पीसीएमसी न्यूज 24.live दि. 18 एप्रिल 2026
पिंपरी चिंचवड महानगरपालिकेच्या ‘ड’ प्रभाग क्षेत्रीय कार्यालयाकडून फेरीवाल्यांवर होत असलेल्या कथित अन्यायकारक व बेकायदेशीर कारवाईच्या निषेधार्थ आज रहाटणी-काळेवाडी येथील ‘ड’ प्रभाग कार्यालयावर विक्रेत्यांनी जोरदार आंदोलन छेडले. “स्टॉल आणि हातगाड्या हटवा, अन्यथा तीन दिवसांत कारवाई करू” असा दम दिला जात असल्याचा आरोप करत विक्रेत्यांनी प्रशासनाला थेट जाब विचारला.
नॅशनल हॉकर फेडरेशन आणि महाराष्ट्र फेरीवाला क्रांती महासंघ यांच्या नेतृत्वाखाली झालेल्या या आंदोलनात कामगार नेते काशिनाथ नखाते यांच्यासह पथ विक्रेता समिती सदस्य राजू बिराजदार, किरण साडेकर, शैलेंद्र गाडे, लक्ष्मण शेरखाने, इरफान चौधरी, सागर कापूरे, मनोज रुपनवर, सुनील भोसले, संतोष बनगर, राजेश माने, नंदू आहेर, रवींद्र गायकवाड, सुषमा शेगावकर, स्वाती दिलापाक, ज्योती ढाकरे, अनाया सावंत, विशाल इचके, सखाराम केदार, लाला राठोड, अशोक पगारिया, झरीना शेख, अंबालाल सुखावल, प्रमोद बोंबले, भाऊ तांबे, अर्चना दिवेकर, रेखा कांबळे यांच्यासह मोठ्या संख्येने फेरीवाले सहभागी झाले होते.
आंदोलनकर्त्यांनी आरोप केला की, महानगरपालिका फेरीवाला कायद्याची योग्य अंमलबजावणी करत नसून गरजू व गरीब विक्रेत्यांवर जाणीवपूर्वक कारवाई केली जात आहे. एकीकडे अनियमित आठवडे बाजारांना संरक्षण दिले जाते, तर दुसरीकडे लहान विक्रेत्यांवर अन्यायकारक कारवाई केली जाते. कारवाईदरम्यान अपमानास्पद वागणूक आणि शिवराळ भाषेचा वापर होत असल्याचाही आरोप करण्यात आला. तसेच विक्रेत्यांना आवश्यक प्रमाणपत्र देण्यात जाणीवपूर्वक टाळाटाळ केली जात असल्याचेही आंदोलनकर्त्यांनी सांगितले.
यावेळी काशिनाथ नखाते यांनी इशारा देताना सांगितले की, “महानगरपालिकेने तात्काळ फेरीवाला कायद्याची अंमलबजावणी केली नाही, तर पुढील काळात बेमुदत उपोषण करण्यात येईल.”
आंदोलनानंतर प्रतिनिधींनी क्षेत्रीय प्रभारी अधिकारी पूजा दुधनाळे यांची भेट घेऊन निवेदन सादर केले. यावेळी झालेल्या चर्चेत दुधनाळे यांनी आयुक्तांच्या उपस्थितीत बैठक घेऊन लवकरच योग्य तो निर्णय घेण्यात येईल, तसेच भाकर झोनसंदर्भात सकारात्मक विचार केला जाईल, असे आश्वासन दिले.
दरम्यान, “फेरीवाला एकजुटीचा विजय असो”, “लढेंगे… जितेंगे…” आणि “बेकायदेशीर कारवाईचा निषेध असो” अशा घोषणांनी ड प्रभाग कार्यालय परिसर दणाणून गेला
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
