हरीश शर्मा | मुख्य संपादक पुणे महापालिका निवडणुकीच्या पार्श्वभूमीवर आता बहुतांश राजकीय पक्षांनी आपापले उमेदवार जाहीर केले आहेत. मात्र यंदाच्या निवडणुकीत एक बाब प्रकर्षाने समोर येत आहे, ती म्हणजे मोठ्या प्रमाणात पक्षांतर. अनेक उमेदवारांनी तिकीट मिळवण्यासाठी एका पक्षातून दुसऱ्या पक्षात प्रवेश करत निवडणूक लढवण्याची तयारी केली आहे.
यामुळे मतदारांच्या मनात संभ्रम निर्माण होणे साहजिक आहे. कालपर्यंत ज्या पक्षावर टीका करणारे उमेदवार आज त्याच पक्षाचे झेंडे हातात घेऊन मतांची मागणी करत आहेत. अशा परिस्थितीत मतदारांनी पक्षावर विश्वास ठेवायचा की उमेदवारावर? हा प्रश्न ऐरणीवर आला आहे.
विशेषतः प्रभाग क्रमांक ८ मध्ये ही परिस्थिती अधिक गुंतागुंतीची बनली आहे. येथे अनेक उमेदवारांनी केवळ स्वतःच्या राजकीय स्वार्थासाठी आणि तिकीट मिळवण्यासाठी पक्ष बदलल्याची चर्चा मतदारांमध्ये सुरू आहे. विकास, स्थानिक प्रश्न, नागरिकांचे प्रश्न यापेक्षा राजकीय सोयीस्कर भूमिका अधिक दिसून येत आहे.
मतदारांमध्ये असा प्रश्न उपस्थित होत आहे की—
जर उमेदवाराची निष्ठा पक्षाशी स्थिर नाही, तर तो जनतेशी किती प्रामाणिक राहील?
आज पक्ष बदलणारा उद्या पुन्हा बदलणार नाही याची खात्री काय?
विकासासाठी लढणारा उमेदवार कोण, आणि फक्त निवडणूक जिंकण्यासाठी मैदानात उतरलेला कोण?
लोकशाहीत पक्ष महत्त्वाचा असतो, पण व्यक्तीची भूमिका, कामाचा लेखाजोखा आणि सातत्य त्याहून अधिक महत्त्वाचे असते. त्यामुळे या निवडणुकीत मतदार भावनिक किंवा पक्षीय निष्ठेपेक्षा विचारपूर्वक निर्णय घेतील का, हे पाहणे महत्त्वाचे ठरणार आहे.
मतदार काय कौल देतील?
स्वार्थासाठी पक्ष बदलणाऱ्या उमेदवारांना नाकारतील की अनुभव आणि काम पाहून संधी देतील—
याचा निर्णय प्रभाग ८ मधील सुज्ञ मतदारच घेतील.
ही निवडणूक केवळ उमेदवारांची नाही, तर मतदारांच्या राजकीय परिपक्वतेची कसोटी ठरणार आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
