चर्मकार समाजातील लाभार्थ्यांना व्यवसाय विस्तारासाठी मदत; सामाजिक व आर्थिक उन्नतीला चालना
पुणे |प्रतिनिधी : दि. 1 जुलै 2026 अनुसूचित जातीतील चर्मकार समाजातील गटई कामगारांना स्वावलंबी बनविण्याच्या उद्देशाने सामाजिक न्याय विभागामार्फत १६ लाभार्थ्यांना गटई स्टॉलचे वितरण करण्यात आले. डॉ. बाबासाहेब आंबेडकर सामाजिक न्याय भवन, विश्रांतवाडी येथे झालेल्या कार्यक्रमात मान्यवरांच्या हस्ते लाभार्थ्यांना स्टॉलचे वाटप करण्यात आले.
कार्यक्रमाच्या अध्यक्षस्थानी सहाय्यक आयुक्त विशाल लोंढे होते. यावेळी संत रोहिदास चर्मोद्योग व चर्मकार महामंडळाचे माजी अध्यक्ष डॉ. ज्ञानेश्वर कांबळे, संत रोहिदास समाज उन्नती संस्थेचे संस्थापक अध्यक्ष संजू रतन बनसोड, संत रोहिदास महामंडळाचे विभागीय अधिकारी अमोल शिंदे तसेच गटई स्टॉलचे लाभार्थी उपस्थित होते.
यावेळी बोलताना सहाय्यक आयुक्त विशाल लोंढे यांनी सांगितले की, शासनाच्या या उपक्रमामुळे चर्मकार समाजातील गटई कामगारांना रोजगाराच्या नव्या संधी उपलब्ध होणार असून त्यांच्या आर्थिक आणि सामाजिक सक्षमीकरणाला चालना मिळेल. या योजनेअंतर्गत व्यवसाय सुरू करण्यासाठी किंवा विद्यमान व्यवसायाचा विस्तार करण्यासाठी आवश्यक स्टॉल उपलब्ध करून देण्यात आले असल्याचे त्यांनी स्पष्ट केले.
कार्यक्रमादरम्यान उपस्थित मान्यवर आणि लाभार्थ्यांचा संविधानाच्या उद्देशिकेची प्रत व पुष्पगुच्छ देऊन सन्मान करण्यात आला. विशेष अधिकारी श्रीमती माधुरी वाघमोडे यांनी कार्यक्रमाची प्रस्तावना केली. लाभार्थी अमोल शिंदे आणि संजय बनसोड यांनी मनोगत व्यक्त करत शासनाच्या या उपक्रमाबद्दल समाधान व्यक्त केले.
कार्यक्रमाचे सूत्रसंचालन राजेंद्र लोहार यांनी केले, तर आभार प्रदर्शन चर्मोद्योग व चर्मकार महामंडळाचे व्यवस्थापक अमोल शिंदे यांनी केले.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
