बैठक रद्द, सरकार मौन – चालकांचे उपोषण दुसऱ्या दिवशीही सुरू; राज्यभर आंदोलनाचा इशारा
मुंबई/पुणे/नागपूर | पुणे पीसीएमसी न्यूज 24.live नेटवर्क
दि. 22 एप्रिल 2026 : ऑनलाईन प्रवासी वाहतूक सेवांशी संबंधित चालकांच्या विविध मागण्यांसाठी सुरू असलेल्या उपोषणाचा आज दुसरा दिवस सुरू झाला असून, अद्यापही प्रशासनाकडून कोणतीही ठोस प्रतिक्रिया मिळालेली नाही. मुंबईतील आंदोलनाबाबत परिवहन आयुक्तालयाकडून अधिकृत अपडेट न मिळाल्याने चालकांमध्ये नाराजी वाढत आहे.
दरम्यान, पुण्यात प्रादेशिक परिवहन प्राधिकरण अंतर्गत जिल्हाधिकाऱ्यांच्या अध्यक्षतेखाली महत्त्वाची बैठक आयोजित करण्यात आली होती. या बैठकीत ओला, उबेर आणि रॅपिडो कंपन्यांचे प्रतिनिधी तसेच चालक संघटनेचे पदाधिकारी उपस्थित राहणार होते. मात्र, कोणतेही स्पष्ट कारण न देता ही बैठक अचानक रद्द करण्यात आल्याची माहिती समोर आली आहे. त्यामुळे प्रशासनाच्या भूमिकेबाबत प्रश्नचिन्ह निर्माण झाले आहे.
नागपूरमध्ये याच विषयावर जिल्हाधिकारी कार्यालयाकडून शुक्रवारी बैठक आयोजित करण्यात आल्याची माहिती देण्यात आली असून, तोपर्यंत तेथील आंदोलन सुरूच राहणार आहे.
सरकारकडून कष्टकरी चालकांच्या प्रश्नांकडे सातत्याने दुर्लक्ष होत असल्याचा आरोप आंदोलकांनी केला आहे. मुंबई, पुणे आणि नागपूर येथे सुरू असलेले उपोषण आणि आंदोलन पुढील काही दिवसांत अधिक तीव्र होण्याची शक्यता व्यक्त करण्यात येत आहे. प्रशासनाने तातडीने दखल घेऊन ठोस निर्णय न घेतल्यास हे आंदोलन राज्यभर पसरवण्याचा इशाराही आंदोलकांनी दिला आहे.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
