“सुरक्षेच्या कारणांचा आधार घेत विशिष्ट समाजाला लक्ष्य केल्याचा संशय” — डॉ. फरहा शेख यांचे निवेदन

बोपोडी | प्रतिनिधी : दी. 27 मे 2026
बकरी ईदनंतर पारंपरिक पद्धतीने साजऱ्या केल्या जाणाऱ्या “बासी ईद” निमित्त अनेक मुस्लिम कुटुंबे शहरातील बागा, उद्याने व पर्यटनस्थळांना भेट देत असतात. या पार्श्वभूमीवर पुण्यातील सारसबाग २८ व २९ मे २०२६ रोजी बंद ठेवण्याच्या निर्णयावर मिस फरहा चॅरिटेबल फाउंडेशनने तीव्र नाराजी व्यक्त केली आहे.

फाउंडेशनच्या अध्यक्षा डॉ. फरहा अनवर हुसेन शेख तसेच सामाजिक कार्यकर्ते अनवर हुसेन शेख यांनी प्रसिद्धीस दिलेल्या निवेदनात म्हटले आहे की, सारसबाग बंद ठेवण्यामागील कारणे प्रशासनाने स्पष्ट करावीत. सुरक्षेच्या कारणास्तव निर्णय घेतला असल्यास, त्याच कालावधीत शहरातील इतर बागांबाबत वेगळी भूमिका का घेतली जात आहे, असा प्रश्नही त्यांनी उपस्थित केला आहे.
निवेदनानुसार, “बासी ईद” निमित्त सारसबागेला भेट देण्याची परंपरा अनेक वर्षांपासून सुरू असून, सार्वजनिक ठिकाणे सर्व नागरिकांसाठी समान हक्काने खुली असली पाहिजेत. सुरक्षेच्या कारणास्तव काही अडचणी असल्यास प्रशासनाने पोलीस बंदोबस्त व अतिरिक्त सुरक्षा व्यवस्था वाढवावी; मात्र विशिष्ट समाजाच्या पारंपरिक कौटुंबिक भेटींवर अप्रत्यक्ष निर्बंध येतील असे निर्णय टाळावेत, अशी मागणी फाउंडेशनने केली आहे.
फाउंडेशनच्या वतीने पुणे महानगरपालिका प्रशासन, उद्यान विभाग तसेच संबंधित अधिकाऱ्यांना लेखी निवेदन देण्यात आले असून, निर्णयाचा फेरविचार करण्याची मागणी करण्यात आली आहे.
डॉ. फरहा शेख यांनी सांगितले की, “सार्वजनिक स्थळांबाबत घेतले जाणारे निर्णय सर्वसमावेशक आणि पारदर्शक असणे आवश्यक आहे. कोणत्याही समाजात गैरसमज किंवा भेदभावाची भावना निर्माण होणार नाही, याची प्रशासनाने काळजी घ्यावी.”
दरम्यान, प्रशासनाकडून यासंदर्भात अधिकृत भूमिका स्पष्ट होणे अपेक्षित असल्याचेही फाउंडेशनच्या वतीने नमूद करण्यात आले आहे.

The post सारसबाग बंद निर्णयावर मिस फरहा चॅरिटेबल फाउंडेशनचा आक्षेप, प्रशासनाने फेरविचार करावा अशी मागणी appeared first on PUNE PCMC NEWS.

कागदपत्रे अपूर्ण राहिल्याने अनेक हातगाडी व्यावसायिक अडचणीत; खडकी छावणी परिषदेला निवेदन सादर

खडकी | प्रतिनिधी : दी. 26 मे 2026                खडकी छावणी परिषद हद्दीतील हातगाडी परवाना धारकांना कागदपत्रे सादर करण्यासाठी देण्यात आलेली मुदत वाढवून द्यावी, अशी मागणी सारथी सोशल फाउंडेशनच्या वतीने करण्यात आली आहे. यासंदर्भात खडकी कॅन्टोन्मेंट बोर्डाचे सहाय्यक मुख्य कार्यकारी अधिकारी सुमन सौरभ यांना निवेदन देण्यात आले.

संस्थेच्या वतीने देण्यात आलेल्या निवेदनात म्हटले आहे की, खडकी छावणी परिषदेकडून हातगाडी व्यावसायिकांना आवश्यक कागदपत्रे सादर करण्यासाठी 30 मे 2026 पर्यंतची मुदत देण्यात आली आहे. मात्र अनेक व्यावसायिकांकडे अद्याप काही महत्त्वाची कागदपत्रे उपलब्ध नसून, त्यामध्ये रहिवासी दाखला, पोलिस व्हेरिफिकेशन तसेच डोमिसाईल प्रमाणपत्र यांचा समावेश आहे. ही कागदपत्रे शासकीय प्रक्रियेमुळे उशिरा मिळत असल्याने अनेक हातगाडी धारकांना अडचणींचा सामना करावा लागत आहे.
तसेच काही व्यावसायिकांनी आवश्यक अर्ज भरून शुल्काची पावती जोडलेली असूनही त्यांची प्रक्रिया अपूर्ण राहिली असल्याचे निवेदनात नमूद करण्यात आले आहे. त्यामुळे सर्व हातगाडी परवाना धारकांना न्याय मिळावा आणि त्यांचा व्यवसाय सुरळीत सुरू राहावा यासाठी मुदतवाढ देण्यात यावी, अशी मागणी
सारथी सोशल फाउंडेशन चे साकिब शेख, गोपाळ वाघमारे, नईम शेख यांनी निवेदनाद्वारे केली आहे.

The post खडकी छावणीतील हातगाडी परवाना धारकांना मुदतवाढ द्या, सारथी सोशल फाउंडेशनची मागणी appeared first on PUNE PCMC NEWS.

नागरिकांच्या सुरक्षित व विनाअडथळा प्रवासासाठी महापालिकेची मोहीम तीव्र; क्षेत्रीय कार्यालयनिहाय कारवाईचा आढावा

पिंपरी | प्रतिनिधी : दि. 26 मे 2026                  पिंपरी-चिंचवड महानगरपालिकेकडून शहरातील पदपथ अतिक्रमणमुक्त करण्यासाठी विशेष मोहीम राबविण्यात येत असून, पदपथांवर अतिक्रमण करणाऱ्यांविरोधात कठोर कारवाईचा इशारा देण्यात आला आहे. दुकानांसमोर साहित्य ठेवून अथवा अनधिकृतपणे जागा व्यापून नागरिकांच्या वाहतुकीस अडथळा निर्माण करणाऱ्या व्यावसायिकांनी पुढील १५ दिवसांत अतिक्रमण स्वखर्चाने हटवावे, अन्यथा महापालिकेकडून थेट कारवाई करण्यात येईल, असे स्पष्ट संकेत आयुक्त डॉ. विजय सूर्यवंशी यांनी दिले.
पिंपरी येथील मुख्य प्रशासकीय भवनात आयोजित बैठकीत आयुक्तांनी क्षेत्रीय कार्यालयनिहाय सुरू असलेल्या अतिक्रमण कारवाईचा आढावा घेतला. यावेळी शहरातील पदपथ नागरिकांसाठी सुरक्षित आणि मोकळे ठेवण्यावर विशेष भर देण्यात आला.
महापालिकेने सर्व क्षेत्रीय कार्यालयांच्या माध्यमातून अतिक्रमणमुक्त पदपथ मोहीम हाती घेतली असून, नागरिकांना चालण्यासाठी विनाअडथळा सुविधा उपलब्ध करून देण्याचे उद्दिष्ट ठेवले आहे. वारंवार त्याच ठिकाणी अतिक्रमण होऊ नये, यासाठी संबंधित अधिकारी व कर्मचाऱ्यांनी अधिक दक्षता घेण्याच्या सूचना देखील देण्यात आल्या.
तसेच शहरातील हॉकर झोन निश्चित करून त्याठिकाणी होकर्स झोन तयार करावा. शहराचा बकालपणा वाढणार नाही तसेच हॉकर्स मुळे रहादरीला अडथळा होणार नाही यासाठी सर्व कार्यालयनिहाय फिरते पथक नेमून त्यावर सातत्याने देखरेख ठेवावी असे निर्देश ही आयुक्त डॉ. विजय सूर्यवंशी यांनी दिले आहे.

The post पीसीएमसीचा अतिक्रमणधारकांना इशारा; १५ दिवसांत पदपथ मोकळे करा, अन्यथा कठोर कारवाई appeared first on PUNE PCMC NEWS.

सामाजिक सलोखा, शांतता आणि कायदा सुव्यवस्था राखण्यासाठी पुणे जिल्हाधिकाऱ्यांना निवेदन

पुणे | प्रतिनिधी : दि. 26 मे 2026                    गाईच्या संरक्षणासंदर्भात देशभरात सुरू असलेल्या विविध चर्चांच्या पार्श्वभूमीवर पुण्यातील मूलनिवासी मुस्लिम मंचाच्या वतीने गाईला ‘राष्ट्रीय प्राणी’ घोषित करण्याची मागणी करण्यात आली. यासंदर्भात पुणे जिल्हाधिकारी जितेंद्र डुडी यांना निवेदन देण्यात आले.
संघटनेच्या वतीने सांगण्यात आले की, देशात सामाजिक सलोखा, बंधुभाव आणि शांतता कायम राहावी, तसेच कोणत्याही प्रकारचा तणाव किंवा गैरसमज निर्माण होऊ नये, यासाठी केंद्र सरकारने या विषयावर स्पष्ट धोरण जाहीर करावे. गाईच्या संरक्षणाची जबाबदारी अधिकृत यंत्रणांकडे प्रभावीपणे राहावी आणि कायदा हातात घेण्याच्या घटनांना आळा बसावा, अशी मागणी निवेदनातून करण्यात आली.
निवेदनात सर्व धर्मांचा आदर राखत शांतता आणि मानवतेचा संदेश देण्यात आला. “धर्म कोणताही असो, मानवी जीवन सर्वांत महत्त्वाचे आहे. समाजात परस्पर विश्वास आणि सौहार्द टिकून राहणे आवश्यक आहे,” अशी भावना यावेळी व्यक्त करण्यात आली.

या आंदोलनाचे नेतृत्व मूलनिवासी मुस्लिम मंचाचे अध्यक्ष अंजुम इनामदार आणि जमीयत उलेमा हिंदचे हाफिज किफायतुल्लाह यांनी केले. यावेळी ऑल इंडिया मुस्लिम पर्सनल लॉ बोर्डाचे सदस्य मौलाना निजामुद्दीन फकृद्दीन, कारी मुबशीर, सोहेल खान, समाजसेविका शाहीन सिंदगी, राजन नायक, विष्णू गरुड, जाहिद शेख, मेहबूब नदाफ, हशीम शेख, इब्राहिम यवतमाळवाला, मोईनुद्दीन शेख, नदीम मेमन आणि सलीम मौला पटेल यांच्यासह मोठ्या संख्येने नागरिक उपस्थित होते.
यावेळी प्रतिनिधींनी जिल्हाधिकाऱ्यांची प्रत्यक्ष भेट घेऊन निवेदन सादर केले.

The post पुण्यात मुस्लिम समाजाची गाईला ‘राष्ट्रीय प्राणी’ घोषित करण्याची मागणी appeared first on PUNE PCMC NEWS.

डॉ. विश्वजीत कदम यांना शॉल व संविधान पुस्तक भेट देत मान्यवरांकडून शुभेच्छांचा वर्षाव

बोपोडी | प्रतिनिधी : दि. 23 मे 2026                  पुणे शहर जिल्हा काँग्रेस कमिटीच्या शहराध्यक्ष पदी निवड झाल्याबद्दल डॉ. विश्वजीत कदम  यांचा पदग्रहण समारंभ शनिवार 23 मे ला काँग्रेस भवन पुणे येथे मोठ्या उत्साहात पार पडला. यावेळी जनहित जागृती मंचाच्या वतीने त्यांचा शॉल व संविधान पुस्तक भेट देऊन सत्कार करण्यात आला.
हा सत्कार जनहित जागृती मंच चे संस्थापक अध्यक्ष  विजय विनायक जगताप यांच्या हस्ते करण्यात आला. कार्यक्रमास प्रमुख उपस्तीथी माजी राज्यमंत्री डॉ. विश्वजीत कदम आमदार पलूस कडेगावं माजी महापौर काँग्रेस अध्यक्ष पश्चिम विभाग प्रशांत जगताप, माजी आमदार व पूर्व विभाग अध्यक्षा दीप्ती चवधरी यांची प्रमुख उपस्तीथी होती.
यावेळी डॉ. विश्वजीत कदम यांना पुढील राजकीय व सामाजिक कार्यासाठी शुभेच्छा देण्यात आल्या. कार्यक्रमास  राजेंद्र भुतडा, प्रशांत जी टीके, अॅड. रमेश पवळे, अजित थेरे, सुंदर ओव्हाळ, संदीप भिसे आदी मान्यवर उपस्थित होते.

कार्यक्रमात उपस्थितांनी काँग्रेस पक्षाच्या संघटनात्मक बळकटीसाठी डॉ. विश्वजीत कदम यांच्या नेतृत्वावर विश्वास व्यक्त करत शुभेच्छा दिल्या.

The post पुणे शहर काँग्रेसच्या नवनिर्वाचित शहराध्यक्षांचा जनहित जागृती मंचतर्फे सत्कार appeared first on PUNE PCMC NEWS.

माहिती अधिकारातून उघड झाली बाब; सचिन कौदरे यांची चौकशीची मागणी, पदभरती व प्रशासकीय प्रक्रियेवर नागरिकांमध्ये चर्चा

खडकी | प्रतिनिधी : दि. 22 मे 2026                        खडकी कॅन्टोन्मेंट बोर्डातील एका कर्मचाऱ्याच्या कामकाजाबाबत माहिती अधिकारातून समोर आलेल्या माहितीनंतर प्रशासकीय पातळीवर नव्या चर्चेला सुरुवात झाली आहे. श्री बाप्पू भालेराव हे सुरुवातीला सफाई कर्मचारी म्हणून खडकी कॅन्टोन्मेंट बोर्डात रुजू झाले होते. त्यानंतर त्यांची बढती होऊन त्यांची नियुक्ती वाहन चालक (ड्रायव्हर) पदावर करण्यात आली होती.
मात्र, गेल्या दहा ते पंधरा वर्षांपासून ते आरोग्य अधीक्षकांच्या कार्यालयात पर्सनल असिस्टंट (पीए) स्वरूपाचे काम पाहत असल्याची माहिती समोर आली आहे. त्यांच्या शैक्षणिक पात्रतेमुळे वरिष्ठ अधिकाऱ्यांनी त्यांना संबंधित कार्यालयीन जबाबदारी दिल्याचे सांगितले जात आहे.

या संदर्भात सामाजिक कार्यकर्ते सचिन कौदरे यांनी माहिती अधिकार कायद्यांतर्गत खडकी कॅन्टोन्मेंट बोर्डाकडे माहिती मागवली होती. त्यामध्ये श्री बाप्पु भालेराव यांची मूळ नियुक्ती, पदोन्नती, सध्याचे कामकाज, शैक्षणिक पात्रता तसेच त्यांना संबंधित विभागात काम देण्याबाबतचे आदेश याविषयी माहिती विचारण्यात आली होती.
माहिती अधिकारातून मिळालेल्या उत्तरानुसार, श्री बाप्पु भालेराव यांनी १ मार्च २००४ ते १४ मे २०१७ या कालावधीत सफाई कर्मचारी म्हणून काम केले असून, १५ मे २०१७ पासून ते वाहन चालक पदावर कार्यरत असल्याचे नमूद करण्यात आले आहे. तसेच त्यांची शैक्षणिक पात्रता बी.कॉम असल्याची माहितीही देण्यात आली आहे.
दरम्यान, वाहन चालक पदावर कार्यरत असलेल्या कर्मचाऱ्याकडून पर्सनल असिस्टंट स्वरूपाचे काम घेतले जात असल्याने प्रशासकीय प्रक्रियेवर प्रश्न उपस्थित केले जात आहेत. संबंधित पद रिक्त असताना दुसऱ्या पदावरील कर्मचाऱ्याकडून दीर्घकाळ ते काम करून घेणे योग्य आहे का, असा सवाल उपस्थित होत आहे. यामुळे संबंधित पदासाठी पात्र असलेल्या कर्मचाऱ्यांवर अन्याय होत असल्याची चर्चाही नागरिकांमध्ये सुरू आहे.
याबाबत खडकी कॅन्टोन्मेंट बोर्ड प्रशासनाकडून अधिकृत भूमिका अद्याप स्पष्ट करण्यात आलेली नाही. मात्र माहिती अधिकारातून समोर आलेल्या या प्रकरणामुळे बोर्डातील कामकाज व पदनियुक्ती प्रक्रियेबाबत प्रश्न उपस्थित होऊ लागले आहेत.

The post ड्रायव्हर पदावर नियुक्ती, पण आरोग्य अधीक्षकांचा पीए म्हणून काम? खडकी कॅन्टोन्मेंट बोर्डात नियुक्ती प्रक्रियेवर प्रश्नचिन्ह appeared first on PUNE PCMC NEWS.

पुणे | प्रतिनिधी : दि. 21 मे 2026                           आमचे मित्र सहकारी दैनिक प्रभातचे वृत्तपत्र छायाचित्रकार संदीप अशोक घोडके (वय ४६) यांचे अल्पशा आजाराने आज गुरुवार, दि. 21 मे रोजी पहाटे साडेपाच वाजता निधन झाले. त्यांच्या पश्चात पत्नी, दोन मुले, वडील, दोन भाऊ व एक बहिण असा परिवार आहे.

पुणे पीसीएमसी न्यूज 24.live संपादक हरीश शर्मा परिवार तर्फे भावपूर्ण श्रद्धांजली 🙏💐

The post दैनिक प्रभात चे छायाचित्रकार संदीप घोडके यांचे निधन appeared first on PUNE PCMC NEWS.

खर्च कपातीसाठी व्हिडिओ कॉन्फरन्स, दौरे मर्यादित; मात्र बँक सेवा सुरळीत सुरू राहणार

पुणे पीसीएमसी न्यूज 24.live | ऑनलाईन वृत्तसेवा : देशातील सरकारी बँकांना केंद्र सरकारने लॉकडाऊनसारखे आदेश दिल्याची चर्चा सोशल मीडियावर सुरू असताना याबाबत कोणतीही अधिकृत बंदी किंवा निर्बंध लागू करण्यात आलेले नाहीत.

मिळालेल्या माहितीनुसार, केंद्र सरकारच्या वित्त विभागाने सरकारी बँका, विमा कंपन्या आणि वित्तीय संस्थांना खर्च नियंत्रणासाठी काही मार्गदर्शक सूचना जारी केल्या आहेत. त्यामध्ये बैठका ऑनलाइन घेणे, अनावश्यक प्रवास टाळणे तसेच कार्यालयांमध्ये टप्प्याटप्प्याने इलेक्ट्रिक वाहनांचा वापर वाढवणे यांचा समावेश आहे.
या निर्णयामागे जागतिक आर्थिक परिस्थिती, वाढता खर्च आणि बचतीवर भर ही प्रमुख कारणे असल्याचे सांगितले जात आहे. मात्र, याचा सर्वसामान्य ग्राहकांच्या दैनंदिन बँक व्यवहारांवर कोणताही परिणाम होणार नसल्याचे स्पष्ट करण्यात आले आहे.
दरम्यान, सोशल मीडियावर “बँका बंद होणार”, “लॉकडाऊनसारखे निर्बंध येणार” अशा अफवा पसरत असल्या तरी नागरिकांनी अधिकृत माहितीवरच विश्वास ठेवावा, असे आवाहन करण्यात येत आहे. �

The post भारतात पुन्हा लॉकडाऊन लागणार? सरकारी बँकांवर ‘लॉकडाऊनसारखे’ आदेश? केंद्र सरकारच्या सूचनांमुळे चर्चांना उधाण appeared first on PUNE PCMC NEWS.

भाडे तत्वावरील दुकान वाटप प्रक्रियेत अनियमितता, भेदभाव व पारदर्शकतेचा अभाव असल्याचा आरोप

खडकी | प्रतिनिधी : दि. 19 मे 2026
खडकी कॅन्टोन्मेंट बोर्डाच्या दुकानांच्या भाडे तत्वावरील वाटप प्रक्रियेत गंभीर अनियमितता, भेदभाव आणि पारदर्शकतेचा अभाव असल्याचा आरोप करत अभिजीत मनोज गडांकुश यांनी मुख्य कार्यकारी अधिकाऱ्यांकडे लेखी तक्रार दाखल केली आहे. तसेच या प्रकरणाची तात्काळ चौकशी करून दोषींवर कारवाई करण्याची मागणीही करण्यात आली आहे.
तक्रारीमध्ये नमूद केल्यानुसार, एका विशिष्ट वर्गासाठी तब्बल 55 दुकाने भाडे तत्वावर देण्यात आल्याचा आरोप करण्यात आला आहे. राष्ट्रीय खेळाडूंसाठी आरक्षित कोटा राखीव ठेवण्यात आला असताना, मागासवर्गीय, खडकीतील रहिवासी, महिला आणि  व्यक्तींसाठी कोणतीही दुकाने उपलब्ध करून देण्यात आलेली नसल्याचे पत्रात म्हटले आहे. त्यामुळे संविधानातील समानतेच्या तत्त्वांचे उल्लंघन होत असल्याचा दावा करण्यात आला आहे.
तसेच डोमिसाइल (रहिवाशी दाखला ) अट केवळ फेरीवाले आणि सामान्य रहिवाशांवर लागू करण्यात येत असून, दुकानमालक किंवा भाडेकरूंवर ती लागू नसल्याचा आरोप करण्यात आला आहे. ही दुहेरी भूमिका असल्याचे गडांकुश यांनी म्हटले आहे.
लिलाव प्रक्रिया जाणूनबुजून विलंबित करून काही स्थानिक प्रस्थापित आणि विशिष्ट लोकांना फायदा पोहोचवण्यात येत असल्याचाही आरोप करण्यात आला आहे. प्रथम विद्यमान दुकानदारांवर डोमिसाइलसह इतर अटी कठोरपणे लागू करण्यात येतात, मात्र त्यानंतर नवीन अर्जदारांवर त्या अटी शिथिल केल्या जात असल्याचा मुद्दाही तक्रारीत उपस्थित करण्यात आला आहे.
मूळ मालकांनी दुकाने भाडे तत्वावर देऊन कॅन्टोन्मेंट बोर्डाचे आर्थिक नुकसान केल्याचा आरोप करत या प्रकरणाची सखोल चौकशी करण्याची मागणी करण्यात आली आहे. गेल्या पाच वर्षांत (2021 ते 2026) दुकानांसाठी किती अर्ज प्राप्त झाले, कोणत्या वर्गातील अर्ज होते आणि त्यावर काय कारवाई करण्यात आली याची संपूर्ण माहिती जाहीर करण्याची मागणीही करण्यात आली आहे.
सध्या आठ दुकाने रिक्त असल्याचे समजत असून, त्यांचा लिलाव कधी व कोणत्या पद्धतीने होणार याची माहिती नागरिकांना देण्यात यावी, अशी मागणीही पत्राद्वारे करण्यात आली आहे. सर्व रिक्त दुकाने पारदर्शक पद्धतीने लिलाव प्रक्रियेतून स्थानिक नागरिकांना प्राधान्य देऊन वाटप करण्यात यावीत, असेही निवेदनात म्हटले आहे.
दरम्यान, सात दिवसांच्या आत योग्य कारवाई न झाल्यास खडकी कॅन्टोन्मेंट बोर्ड कार्यालयासमोर आमरण उपोषण करण्याचा इशाराही तक्रारदारांनी दिला आहे.

The post खडकी कॅन्टोन्मेंट बोर्डातील दुकानांच्या भाडे वाटपावर गंभीर आरोप; चौकशीची मागणी appeared first on PUNE PCMC NEWS.

खडकी | प्रतिनिधी : दि. 19 मे 2026              खडकी कॅन्टोन्मेंट बोर्ड हद्दीतील रेंजहिल्स येथील लोकशाहीर अण्णाभाऊ साठे मार्केटच्या सीमाभिंतीजवळ असलेला ओटा खडकी कॅन्टोन्मेंट बोर्डाचे आरोग्य निरीक्षक प्रसाद गावंडे यांनी विनापरवाना जेसीबीच्या साहाय्याने तोडून कॅन्टोन्मेंट बोर्डाच्या मालमत्तेचे नुकसान केल्याचा आरोप करत बहुजन मुक्ती पार्टीच्या कार्यकर्त्यांनी खडकी कॅन्टोन्मेंट बोर्ड कार्यालयासमोर धरणे आंदोलन छेडले.

या आंदोलनामध्ये दोन प्रमुख मागण्या करण्यात आल्या. पहिली मागणी म्हणजे खडकी कॅन्टोन्मेंट बोर्डात कार्यरत असलेले आरोग्य निरीक्षक प्रसाद गावंडे यांनी बेकायदेशीररित्या कॅन्टोन्मेंटच्या मालमत्तेची तोडफोड केल्याचा आरोप करत त्यांच्यावर तात्काळ कारवाई करण्यात यावी. तसेच दुसरी मागणी रेंजहिल्स येथील अण्णाभाऊ साठे मार्केटमधील बेकायदेशीर ताब्यांविरोधात करण्यात आली आहे.
आंदोलकांच्या म्हणण्यानुसार, रेंज हिल्स कॅन्टोन्मेंट मार्केटमध्ये 1980 पासून लिलाव प्रक्रिया झालेली नाही. त्यामुळे अनेकांनी बेकायदेशीर ताबा घेऊन दुकाने सुरू ठेवली असून संबंधितांवर कायदेशीर कारवाई करण्यात यावी, अशी मागणी आंदोलनकर्त्यांनी केली.
या आंदोलनात उदय धेंडे, सुजित म्हस्के, देवेंद्र वेणुगोपाल, रिकी परदेशी, राजेश मोरे, अभिजित गडांकुश, राहुल अवचिते, निखिल दुर्गा, कार्तिक पाळकर, शुभम धेंगळे आणि ऋषी डोरके आदी कार्यकर्ते सहभागी झाले होते.
“जोपर्यंत आमच्या मागण्या मान्य होत नाहीत, तोपर्यंत लढा सुरूच राहणार,” असा इशारा आंदोलनकर्त्यांनी यावेळी दिला.

दरम्यान, याबाबत प्रतिक्रिया देताना खडकी कॅन्टोन्मेंट बोर्डाचे आरोग्य निरीक्षक प्रसाद गावंडे म्हणाले, “रेंजहिल इस्टेट परिसरात सुविधा पुरवण्याचे काम खडकी कॅन्टोन्मेंट बोर्डामार्फत केले जाते. एएफकेकडून सूचना प्राप्त झाल्यानंतर संबंधित ओटा हटविण्यात आला. त्या ठिकाणी बेकायदेशीर अतिक्रमण करण्यात आले होते.”

The post रेंजहिल्समधील अण्णाभाऊ साठे मार्केट परिसरात तणाव appeared first on PUNE PCMC NEWS.