कैद्यांच्या पुनर्वसनाला चालना , ‘श्रुंखला उपहारगृह’ला मिळणार नवा उत्पन्नाचा स्त्रोत
पुणे | प्रतिनिधी : दि. 21 मार्च 2026
समाजातील वंचित घटकांना मुख्य प्रवाहात आणण्यासाठी डिस्ट्रिक्ट 313 मधील पुण्यातील विविध इनरव्हील क्लब्सच्या संयुक्त विद्यमाने एक स्तुत्य उपक्रम राबविण्यात आला आहे. इनर व्हील क्लब ऑफ पुणे प्लॅटिनम, पुणे रिव्हर रिदम्स, रिव्हरसाईड, पुणे विंग्ज, बाणेर हिल्स, पुणे सेंट्रल आणि पुणे इम्पिरियल यांच्या सहकार्याने येरवडा ओपन जेलमधील ‘श्रुंखला उपहारगृह’ या कॅन्टीनसाठी सुमारे 43,800 रुपयांची ऊस रस काढण्याची मशीन भेट देण्यात आली.
या उपक्रमासाठी श्रीमती सुषमा कोंडे आणि जेल अधीक्षक श्री शामकांत शेगडे यांचे विशेष सहकार्य लाभले. खुले कारागृहातील कैद्यांकडून चालवले जाणारे ‘श्रुंखला उपहारगृह’ हे केवळ कॅन्टीन नसून, कैद्यांच्या पुनर्वसनासाठी आणि आत्मविश्वास वाढीसाठी एक प्रभावी व्यासपीठ ठरत आहे.
दररोज सुमारे 10,000 आयटी क्षेत्रातील कर्मचारी, शासकीय अधिकारी तसेच नागरिक या उपहारगृहाला भेट देतात. त्यामुळे कैद्यांना समाजाशी थेट संवाद साधण्याची आणि स्वतःची सकारात्मक ओळख निर्माण करण्याची संधी मिळते.
या प्रकल्पाचा मुख्य उद्देश कैद्यांना स्वावलंबी बनवणे आणि त्यांना आर्थिकदृष्ट्या सक्षम करण्यासाठी नवी संधी उपलब्ध करून देणे हा आहे. ऊस रस मशीनमुळे कॅन्टीनमध्ये नवीन उत्पन्नाचा स्त्रोत निर्माण होणार असून, त्यातून कैद्यांना व्यवसायिक कौशल्ये आत्मसात करता येणार आहेत. यामुळे त्यांच्या मनात कामाविषयीची जबाबदारी, आत्मविश्वास आणि स्वाभिमानाची भावना अधिक दृढ होणार आहे.
हा उपक्रम केवळ आर्थिक मदत नसून, कैद्यांच्या आयुष्यात सकारात्मक बदल घडवण्याचा एक प्रयत्न आहे. ‘बिहाइंड बार्स, बियॉन्ड लिमिट्स’ या संकल्पनेला साजेसा हा उपक्रम कैद्यांना नवजीवन देण्याचा आणि आत्मनिर्भरतेकडे नेण्याचा प्रेरणादायी आदर्श ठरत आहे. समाजात संवेदनशीलता आणि सहकार्याची भावना वाढवणारे असे उपक्रम निश्चितच परिवर्तनाचे नवे मार्ग दाखवत आहेत.
मुख्य संपादक – हरीश शर्मा.
नमस्कार 🙏 मी हरीश शर्मा ( पत्रकार ) गेली 15 वर्षे पुणे शहर व जिल्ह्यातील महत्वाच्या घडामोडींवर ग्राउंड लेवल वर पुण्यातील प्रसिद्ध वर्तमानपत्रात बातमीदारी केली असून यासाठी मला अनेक पुरस्काराने सन्मानित करण्यात आले तसेच कोरोना काळात ही जीवाची पर्वा न करता प्रामाणिक पत्रकारीता केल्याबद्दल ही ‘कोरोना योद्धा ‘ पुरस्काराने ही विविध संस्था संघटना ने सन्मानित केले . पत्रकार संघ तसेच ‘मुंबई वृत्तवाहिनी वृत्तपत्र पुणे जिल्हा शहर उपाध्यक्ष’ पदी असताना ही उल्लेखनीय कामगिरी केली आहे हे सर्व करत असताना आता थोडस वेगळं काहीतरी करायची इच्छा आहे मित्रांनो यापुढे ही न्युज पोर्टल चॅनेल च्या माध्यमातून माझ्या हातून चांगले कार्य व ताज्या घडामोडींवर प्रखर प्रकाश पडावा व माझ्या हातून निष्पक्ष निर्भीड बातमी यासाठी तुमच्या सर्वांच्या आशीर्वादाची अपेक्षा करून चॅनेल चा श्री गणेशा करीत आहे. यासाठी आपले पाठबळ कायम माझ्या पाठीशी राहील ही अपेक्षा करतो. 🙏
